يقول المواطن عادل فاخر: أخذت الجلكانات ورحت أملي نفط أبيض، على رقم (8)، من البانزينخانة القريبة ختمت البطاقة حسب الأصول ودفعت الرسوم. ولكيت خمس سراوات وعلى كل مضخة هوزين اثنين وبوزچي واحد، المهم الموضوع ملحمة، رجال ونساء وشباب وأطفال.
وكفت بالدور أني وجلكاناتي الثلاث، باوعت حسبت (18) كدامي بس كل واحد جايب (12) جلكان وياه، مالته ومالت بيت أخته ومالت بيت عمته وخالته، والسرة مشي السلاحف، بعد مرور ساعة اشو حسبت صار كدامي (20) شني هاي، ينقصون لو يزيدون. بقيت أخطب وأحرض على اليضربون السرة، وشحذت الهمم يلا مش الحال. ومن ساعة (11) لحد (2) بعد الظهر، لأن إخوتنا بالأحياء المجاورة هم جايين للكرنفال. كله هذا تحضيرا لبرد العجوز وأيام الچلة، لأن بالچلة ماكو كهرباء نصدرها لدول الجوار، لذلك نعوضها بالصوبات النفطية.
