بقلم / إياد الإمارة ..
حياكم الله خطارنا من دول الخليج كويتي قطري بحريني ومليون هلا وغلا باليمنيين والعمانيين وبعدنا نعتب على السعوديين بس كل الهلا بيهم.
هاي البصرة وهذولة اهلها الطيبين كلمة الحبوبي على لسانهم من أول ما يدخل خطارهم لحد ما يطلع بخير وسلامة.
أهل البصرة (بصرة الشهيد ابو مهدي المهندس رضوان الله عليه) وبقية أهل العراق أهل محبة وسلام وايدي ممدودة تصافح الجميع بنوايا حسنة.
وكل مَن جاء في أول مرة يقود سيارة مفخخة أو يرتدي حزام ناسف أو يحمل سيفاً يحز به رقابنا قام الشهيد الحاج أبو مهدي المهندس رضوان الله عليه وابنائه برده ولجم شره لتكون البصرة ويكون العراق مشرع أبواب المحبة يستقبل الجميع.
شفتوا شلون استقبلوكم أهل البصرة وكل العراقيين؟
هذولة اخوان الشهداء وابنائهم وخواتهم وامهاتهم..
أي والله..
بس ملاحظة: كواولة الشوارع ليسوا من الشهداء وعوائلهم بشيء وهم أبعد ما يكون عنهم.
وبعد مرة نگول ونكتب: كل الهلا بيكم وبجيتكم وإن شاء الله البصرة والعراق يبقون يرحبون بيكم الدهر كله.
وإذا طاب لكم العراق عاودوا الزيارة مرة ومرتين ومية مرة تلگونة عين فراش وعين غطة ويا حي الله كل مَن جانة.
